隔牆有耳：民國中女 畫蝶解悶

民國一班女子繪絹畫蝶，合著《百蝶圖冊》。

王司馬筆下嘅金庸小說插圖。陳耀強攝

今時今日中女愛扮靚，以前中女又興啲乜？答案係：彩畫繪絹。新亞圖書中心本周六、日拍賣舊書字畫，有本民國年代出版嘅《百蝶圖冊》，底價 10,000元，由一班大家閏秀合著，佢哋為怕獨守空幃，就寄情繪絹畫蝶，蝴蝶形態精緻雅麗，唯美味濃，同真嘅冇乜分別；每幅作品都配上詩詞，夠晒附庸風雅。圖冊底價 1萬元。

1300件作品拍賣

今次拍賣近 1,300件作品，是歷屆最多。八方噚日率先預覽，發現有兩幅王司馬畫作，每幅底價 1,000元。但睇真啲唔係家喻戶曉嘅《牛仔》作品，而係金庸小說插圖，坊間罕見。王司馬仲好鬼馬，冇標明畫中男女係邊本金庸小說嘅主角。新亞負責人蘇賡哲都賣關子，叫大家估吓，如果係金庸迷一定知道。

寫下《邊城》、《長河》等名著嘅沈從文，自中共 1949年上台後封筆，轉投文物研究，曾詳細紀錄中國歷代服飾變化， 81年以 79歲高齡出版《中國古代服飾研究》，備受推崇，其中 300本精裝八開連錦函，更有佢嘅親筆簽名。今次拍賣一本係編號 67嘅書籍，底價 1,000元。不過蘇賡哲慨嘆，伊家 80後、 90後都唔知邊個係沈從文，令人惋惜。
李八方
20120425蘋果
http://www1.hk.apple.nextmedia.com/template/apple/art_main.php?iss_id=20120425&sec_id=4104&art_id=16279443